Sinulat ni Rey Anthony Chiu
Misulbong ngadto sa 301 % ang kadaghanon sa mga nabakunahan sa usa ka adlaw lamang kon itandi sa inadlaw nga average gikan sa Nobyembre 10 ngadto sa Nobyembre 24.
Kini maoy unod sa taho sa Bohol Emergency Operations Center (EOC) sa unanag adlaw sa National Vaccination Day (NVD) Accomplishment sa tibuok Bohol.
Matud poa sa EOC sa taho niini nga gipaambit sa Bohol Inter Agency task Force on the management of Emerging Infectious Diseases, anaa lamang sa 9,870 ang kinatibuk-ang inadlaw nga average sa nabakunahan sa tibuok Bohol gikan sa Nobyembre 10 ngadto sa Nobyembre 24, 2021.
Sa unang adlaw sa NVD, mikabat sa 41,796 ang nakab-ot sa usa lamang ka adlaw.
Niini nga kadaghanon, sa usa ka adlaw nga pamakuna, 35,978 ang nakakuha sa unang dose sa tag duha ka tupokan nga bakuna, segun sa EOC.
Kini, matud pa sa EOC, 64.45% na sa ilang gitakdan nga makakuha sa unang dose sa bakuna batok sa Coronavirus disease (Covid) sa unang adlaw sa NVD.
Ang Bohol may inadlaw nga NVD target nga maobut sa 36,693.
Lain pa nga 5,738 usab ka mga Bol-anon ang nahatagan sa kompleto nga dose sa bakuna human sa ilang ikaduhang tupokan, Nobyembre 29, 2021, matud gihapon sa EOC.
Miabut usab sa 80 ka tawo nga naa sa dakong risgo sa pagtakod sa Covid tungod sa ilang pagkalun-oy sa mga trabaho-an diin giatiman ang mga pasyente sa maong sakit, ug kadtong mga nabakunahan na apan ubos pa gihapon ang ilang panalipod sa lawas dala sa daan nang gihambin nga sakit.
Sa ikaduhang adlaw sa pamakuna sa NVD, mikabat usab sa 36,643 ang mga katawhan nga naabut sa bakuna teams.