Sinulat ni Elvira Bongosia
Gimando na ni Presidente Rodrigo Roa Duterte ang pagtukod ug Overseas Filipino Workers (OFW) Hospital sa San Fernando City, Pampanga.
Ang direktiba sa Pangulo nahisulod sa Executive Order 154, nga mao usab ang nagmugna sa Inter-Agency Committee on the OFW Hospital (ICOH), diin ang Kalihim sa Department of Labor and Employment (DOLE) ang mobarog isip chairman samtang ang Kalihim sa Department of Health (DOH) usab ang co-chairman.
Ang mga miyembro niini gilangkoban sa Kalihim sa Department of Budget and Management (DBM), mga hepe sa Philippine Overseas Employment Administration (POEA) ug Overseas Workers Welfare Administration (OWWA) ug duha ka representante sa land-based ug sea based-OFWs.
Ang pondo alang sa pagpatukod ug pahiunang operasyon sa tambalanan kuhaon gikan sa pondo sa DOLE.
Nag-unang tulobagon sa tambalanan ang panginahanglang pang-medikal o healthcare needs sa mga OFWs ug kwalipikadong dependents.
Sa usa ka pahayag, miingon si Cabinet secretary ug acting presidential spokesperson Karlo Nograles nga gi-konsidera ang pagtukod sa maong specialty hospital nga alang sa mga OFWs, isip “long overdue recognition” sa bililhong kontribusyon sa Filipino migrant workers sa ekonomiya ug sa nasod.
Gikan sa milyong Filipino nga nagtrabaho sa ubang nasod, 800,000 ang nibalik sa Pilipinas sukad sa pagbuto sa Coronavirus disease (Covid) pandemic niadtong unang parte sa niaging tuig, base sa datos sa gobyerno.
