Sinulat ni Rey Anthony Chiu
Dinhi sa Bohol ang may labing daghan nga vaccination posts sa tibuok Central Visayas.
Gitaho ni Dr. Shelbay Blanco sa Department of Health (DOH) Central Visayas Center for Health and Development (CV-CHD) nga sa kinatibuk-ang Central Visayas, ang Bohol ang may labing daghang vaccination posts ang ihap niini anaa sa 255, o may average nga sobra sa lima ka vaccination posts sa matag lungsod.
Hinuon, kon itipo ang sa Cebu City, Cebu Province ug sa duha nila ka highly urbanized cities sama sa Mandaue ug Lapulapu, moabut ang Cebu ug 325 ka bakunahan.
Duha ka gatus ug kalim-an ang mga vaccination posts sa Cebu Province, 100 sa Negros Oriental ug lang 41 ka posts sa Siquijor.
Didto sa ika upat nga quarter nga online nga tigum sa Regional Peace and Order Council (RPOC), gitaho usab ni Blanco ang dagan sa pamakuna sa kinatibuk-ang Central Visayas.
Apan sa labing bag-ong kalambu-an, gikataho sa Bohol Inter Agency Task Force (BIATF) nga hangtud sa Dis. 14, 2021, nakaabut na ang Bohol sa 42% sa katawhan nga buot niining mabakunahan.
Sa taho nga gipagawas sa BIATF mikabat na ngadto sa 402,714 ang mga Bol-anon nga natupokan ug kaduha nga higayon.
Ang kasamtangan nga nakab-ut, dako na kaayo ang kaugmaran kon intandi sa unang lima ka buwan dihang nagsugod ang pamakuna.
Giingon nga ang pagpahimutang sa Bohol sa daghan nga mga fixed vaccination sites o vaccination posts lakip na ang best practice nga paghulma ug nga mobile vaccination teams, maoy nagtabang nga modaku ang maabut sa Bohol.
Gawas pa niana, ang paghimo sa tulo ka adlaw nga National Vaccination Drive, nagpalobo sa mga kadaghanon sa nabakunahan sa Bohol.
