Sinulat ni Dave Albarado
Dili mo menus sa 60 porsento sa backbone line sa Bohol 1 Electric Cooperative (Boheco 1) ang na apektohan sa bagyong Odette nga naglakip sa linya, poste ug mga transformer, kini matod ni Engr. Alger Siga, pinaagi sa usa ka taho nga nadawat sa The Bohol Tribune.
Matod ni Siga nga kon duna nay kuryente gikan sa National Grid Corporation of the Philippines (NGCP) ang ilang kadaghanan sa mga substation ang andam nga modawat sa maong supply ug kini ang ipangapod apod sa mga kunsumidor.
Dugang pa ni Siga, adunay duha ka special tower sa NGCP nga nagdawat sa supply gikan sa Leyte nga anaa sa Carlos P. Garcia ang apektado sa bagyong Odette.
Gawas niini, sa initial nga assessment sa NGCP, ubay-ubay sa ilang linya sa 69 kv ang apektado gumikan sa bagyo.
Samtang nag-restore ang NGCP sa ilang linya, ang Boheco 1 nag-restore usab sa ilang linya nga nadaot sa bagyo aron sa higayon nga duna nay kuryente gikan sa NGCP puwede na mapasiga ang mga kabalayan sa pipila ka mga konsumidor.
Ang mga lungsod nga dunay dakong damage sa linya sa Boheco 1 mao ang mga lungsod sa Sagbayan, Clarin, Inabanga, Tubigon, Calape, Balilihan ug San Isidro.
Di pa kahatag insaktong takna ang Boheco 1 kun kanus-a gayud hipno nga mabalik ang kuryente.
