Sinulat ni Rey Anthony Chiu
Parehas nga nasinati sa kinatibuk-ang Central Visayas ang pag-ubos sa mga kaso sa Coronavirus disease (Covid) ug natala sa rehiyon ang 54.2% nga pag-us-os sa mga kaso, apan gitutokan karon ang Siquijor ug Negros Oriental tungod sa natala niini nga Average Daily Attack Rate (ADAR).
Ang ADAR usa sa mga timailhan sa nagta-as o nag-ubos nga kaso sa Covid.
Ang Negros Oriental mitala sa ADAR nga anaa sa 1.52 samtang ang Siquijor mitala sa ARAD nga 1.27.
Kini samtang ang Bohol mitala na lamang sa ADAR nga 0.27, ihap nga nakuha sa katapusang duha ka semana nga milabay.
Niining tuiga, labing daghang mga apektado sa Covid nagagikan sa 21-30 anyos, bisan pa kon dili dinhing mga edara ang anaa sa dakong risgo sa pagkamatay.
Sa taho ni Dr Shelbay Blanco, Medical Officer III sa Central Visayas Center for Health And Development (CV-CHD) sa Department of Health -7, mikabat sa 25% ang nasakit sa Covid, nagagikan sa 21 ngadto sa 30 anyos.
Kini miabut sa kadaghanon nga 30,817 ka tawo sa kinatibuk-ang Central Visayas.
Kin usab samtang hangtud sa Dis. 11, 2021, mikabat na sa 121,623 ka taga Central Visayas ang natakdan ug nagpositibo sa Covid sukad niadtong ang kaso unang namatikdan sa rehiyon niadtong unang mga buwan sa 2020.
Hinuon, matud pa sa opisyal sa DOH-7, halos parehas na ang percentages sa kalalakinhan ug kababayen-an nga naigo sa sakit.
Sa kinatibuk-ang kaso sa rehiyon, katunga sa kadaghanon sa mga naCOVID dinhi, nangagikan sa Cebu City ug Cebu province, 16% ang nagagikan sa Bohol, 15% ang nagagikan sa Negros Oriental, 9% ang gikan sa Lapulapu City, 8% ang gikan sa Mandaue ug 2% ang nagagikan sa Siquijor.