Sinulat ni Rey Anthony Chiu
Karon nga pipila pa lang ka water refilling stations ang nagpadagan sa ilang makina pinaagi sa generator ug dugang tubil nga gasolina, pila man gyud ang angayan nga presyo sa standard nga puno nga lima ka gallon nga sudlanan?
Kini nga pangutana milutaw human ang Department of Trade and Industry (DTI) sa Bohol nagpasibya ug nagpamantala sa panawagan ngadto sa katawhan nga isumbong sa ilang buhatan ang iregular nga presyo sa giprosesong tubig mainom.
Hinuon, walay gibutang sa DTI advisory kon pila gayud ang gitugot nga patong samtang ang pipila ka water refilling stations namuhunan ug dugang alang sa generator ug gasolina nga ikaproseso sa pagfilter sa tubig.
Sa ilang public advisory, giaghat sa DTI Bohol ang publiko sa pagsumbong sa bisan unsa nga katingad an nga pagsaka sa presyo sa giprosesong tubig gikan sa mga water refilling stations.
Wala usab hisguti sa DTI ang paglobo usa sa presyo sa batonaw o “ice” bisan pa nga kini gikan sa giproseso nga tubig.
Samtang may water refilling stations nga nagbaligya nag tag P50 ang 5 ka gallon nga sudlanan, nasayran usab nga ang presyo sa usa ka supot nga ice, moabut na ngadto sa P100.
Sa ilang advisory nga gipagawas, gitambagan ang mga konsumidor nga ipadala apil sa sumbong pinaagi sa text message ang pangalan sa water refilling station (business name), address o lokasyon niini, kasamtangan nga presyo ug mga hulagway sama sa resibo o pruweba o kamatuoran sa transaksyon.
Ipadala ang sumbong lakip na ang mga hulagway ngadto sa 09173005810, o sa tel no (038) 501-8260, ug mahimo usab nga ma email ngadto sa r07.bohol@dti.gov.ph o ipadala isip mensahe sa DTI Bohol Facebook Page.
