Sinulat ni Ven Rebo Arigo sa PRIMER
Ang mainstream media modelo unta sa neutral, patas, makiangayon ug responsableng pamahayag.
Apan gapasiugda na nuon sa intriga ug lipat-lipat kay may gidapigang pulitiko.
Ilang gibagyo sa gikusgon ug kamangtas ni Odette ang kaugalingong propesyon!
Bisan sa paningkamot ug pagpangunag nilag lihuk sa krisis nga resulta sa bagyong Odette, ang kadagkuan sa Kapitolyo gisigeg pika sa negatibong plastada sa mga balita ug programang intrigador.
Sa press conference sa Kapitolyo niadtong Dis. 30, 2021 gilapdosan ni kanhi gobernador ug karon Bise Gob. Rene Relampagos ang DYRD/Bohol Chronicle.
“Motabang ta imbes modugang sa problema,” matud sa ikaduhang labing taas nga piniling opisyal sa lalawigan.
Klarong gilood na ang bise gobernador sa media nga matud niya nagsigeg pangitag bikil aron mamaot ang administrasyon sa probinsiya.
Iyang gisaway ang kanunayng pagtuis sa estorya samtang ang mga yanong tawo di kabantay sa lipat-lipat nga estelo sa pamalita.
Tanan apektado sa bangis nga katalagman ug imbes magsigeg sugbag estorya, mangita tag sulbad sa problema, matud ni Relampagos.
Apil sa lubag nga estoryang gikatag ang kuno pagkabangkaruta na sa probinsiya kalabot sa calamity fund.
Subay sa lagda ug regulasyon, 30% lang sa calamity fund ang gamiton alang sa quick response.
Bisan sa halos duha na ka tuig nga kalamidad tungod sa Coronavirus disease (Covid), ang kagamyanang probinsiyal adunay pay nahibiling P30 milyones alang sa quick response ug kini gigamit karon ilabina sa relief operation.
Sa susamang press conference, ang kanhi gobernador usab nga si Kong. Edgar Chatto nilabtik ngadto sa mainstream media kay sayon ra man unta ang pagsusi ngadto sa tukmang natungdang opisyal sa Kapitolyo sama sa Provincial Budget Officer.
Kini aron di magpaturapak ang mediang bias nang daan ug di mosamot kabulgar ang pagdapig niini sa ubang pulitiko, ilabina kadtong laway ray pilit ug sa buhat nihit.
Diretsong giyagyag ni Chatto nga way mainstream media nga nikontak kang Provincial Budget Officer Peter Retutal aron unta magpakisusi kon unsay aktuwal ug tinuod.
Kini gikumpirmar mismo ni Retutal kang Chatto sa dihang nangutana ang kongresista sa budget officer.
Subling niingon si Chatto, kinsa gobernador atol sa dakong linog sa 2013, nga ang paghiusa sa aksyon maoy bugtong agianan ngadto sa pag-ayo ug pagpahiuli gikan sa kadaot sa bagyo.
Naa pay social media nga di mapugngan, matud ni Chatto.
Sama sa iresponsable mainstream media, makahatag kinig half-truth o lonlon bakak ug panglingla mismo.
Si Gob. Arthur Yap wa poy kahadlok nga nitirada sa abusadong media nga dili gamiton ang kahimtang aron tuison ang ilang mga sulti ug buhat.
Gitubag niya ang taga DYRD/Bohol Chronicle nga bukas kanunay ang iyang linya sa komunikasyon.
Apan ginawong sa gobernador pagbilin kining duha ka mga pangutana: Will you be fair? Will you stop spreading lies?
Ang pamahayag sa tulo ka mga gobernador balik-balik nga gipakpakan ug gisuportahan sa mga nisaksi sa press conference.
Apil didto ang ubang opisyal ug kawani sa probinsiya ug mga opisyal nga representante sa nagkalain-laing ahensiya ug sektor nga nagtinabangay sa pagpabarug ug balik sa Bohol gikan sa pagkahagba sa bagyo.
Sa atubangan sa media, ang mga opisyal sa Boheco I, Boheco II ug Bohol Light nagpasalamat kang Yap.
Matud nila, si Yap mao gyoy nangusog sa Department of Energy ug Energy Regulatory Commission nga maaprubahan ang exemption ug provisional authority sa mga power utilities aron makakutay sa kuryente pohon gikan sa power barge ug Dampas power plant.
Aduna nay mga dapit sa Bohol nga mabalik ang elektrisidad sa mosunod nga mga adlaw bisag padayon pa ang kutas nga tahas sa power recovery sa tibuok lalawigan.
