Sinulat ni Ven rebo Arigo sa PRIMER
Naniguro si Gob. Arthur Yap ug Bise Gob. Rene Relampagos sa mga local oil industry players nga makasuplay gyod sila tumbas sa igong panginahanglan sa Bohol sa mosunod nga duha ka semana.
Basi sa mga datos nga gikan mismo sa industriya, mokunsumo ug 19 milyon ka litros nga gasolina ug krudo ang Bohol sukad Dis. 30, 2021 adlawa hangtud sa Enero 10, 2022 taliwa sa abnormal nga pagsulbong sa demand human sa bagyong Odette.
Kon mahimo di na magrasyon kay aduna man gani shipping company nga andam motabag hakot sa mga oil tankers aron isupply sa Bohol kon magkasinabot ang mga oil companies, matud ni Yap.
Ang big three oil companies nga gilangkoban sa Petron, Caltex, Shell ug ang mg new player nga Total adunay 10 milyon ka litros nga gasolina ug krudo nga i-deliver hangtud sa Enero 8, 2022.
Posibleng adunay advance shipment sa di pa ang Enero 10 isip dugang nunot sa awhag sa gobernador kinsa subling nakigtagbo sa mga industry players sa Kapitolyo niadtong Dis. 30, 2021.
Gitawagan ni Yap ang usa ka opisyal sa new player nga Seaoil kinsa nipasalig nga mo-deliver ug 3 milyones litros sugod sa Enero 4, 2022.
Mga 70% sa mga gas stations sa Bohol ang gipanag-iya sa mga new players/small players/independent players kon itandi sa 30% lang sa mga gasolinahan nga gipanagiya sa big three.
Gilauman nga daghan sa mga new/small/independent players ang masuplayan na gikan sa Sugbo.
Matud ni Manjo Lim sa Caltex, ilang namatikdan nga bentaha na karon kon itandi sa nilabayng semana ug mga adlaw human gyod sa bagyo bisag layo pa ang pagbalik sa normal nga kahimtang gumikan sa kalapad sa ladaot ug epekto niini.
Nibutyag si Lim nga naka-deliver na gani sila hangtud sa islang lungsod sa Pres. Garcia.
Sa laing bahin, gipaniguro usab ni Yap nga kanunay ang koordinasyon ni Provincial Administrator Kathyrin Pioquinto tali sa Civil Aviation Authority of the Philippines (CAAP) ug Petron aron way balda ang operasyon sa Bohol Panglao International Airport (BPIA).
Sa niaging semana, girescue sa Kapitolyo ang BPIA gikan sa posibleng shutdown sa operasyon niini kay gibalibaran nga makapalit og krudo sa Petron para sa dakong generator set nga naghatag ug elektrisidad sa tibuok tugpahanan.