Sinulat ni Dave Albarado
Nagpasalamat ang mga opisyal sa mga distribution utility (DU) sama sa Bohol 1 and 2 Electric Cooperative (BOHECO I and 2) ug Bohol Light Company kang Gob. Arthur Yap nga ilang giingon nga maoy mitabang kanila ngadto sa Department of Energy (DOE) ug Energy Regulatory Commission (ERC) alang sa exemption ug provisional authority aron magamit ang power barge nga nagdunggo karon sa lungsod sa Ubay.
Sa pagkakaron gigamit ang power barge alang sa inanay nga pagbalik sa koryente bisan kon dako pa ang kadaot nga ayohon nga gibilin sa bagyong Odette.
Matod pa kinahanglang di una ipatuman ang naandan nga mga lagda ug regulasyon sa DOE ug ERC aron makakuhag kuryente ang mga local DU direkta gikan sa power barge.
Kinahanglan ang pagtugot sa DOE ug ERC aron adunay bisag limitado lang nga kuryente alang sa pipila ka mga dapit sa Bohol samtang madugay pa ang kinatibuk-ang pag-ayo sa mga linya hangtud nga makakutay ug balik sa tinubdan sa kuryente gikan sa Leyte.
Nasayran sa Bohol Tribune gikan sa Bohol Light Company nga dunay 9 ka feeder ang naa sa siyudad sa Tagbilaran ug 6 na ang na-energize.
Napasiga pa nila ang mga patigayon ug mga private transformer sa mga commercial establishment apan musunod di madugay ang mga kabalayan.
