Sinulat ni Dave S. Albarado
Ang kagamhanan sa lungsod sa Catigbian ang nakapanghatag dayon og mga hinabang sa mga lumulupyonsa lungsod human sa pag-igo sa bagyong Odette.
Mao kini ang nasayran gikan ni Koop Kampi Party List 2nd nominee Benjie Oliva kinsa lumad nga taga Catigbian pinasikad sa mga taho nga na dawat sa The Bohol Tribune.
Matod ni Oliva nga ang local government unit (LGU) sa Catigbian pinangulohan ni Mayor Elizabeth Mandin sa wala pa moabot ang bagyo nangandam nang daan sa mga kinahanglan aron adunay ihatag o itabang nga ayuda ngadto sa katawhan sa maong lungsod.
Ang kanhi Commissioner sa National Youth Commission ug kanhi administrator sa Cooperative Development Authority miingon nga pipila ka adlaw sa wala pa moabot ang bagyo, ang kagamhanan sa lungsod nag-andam ug mga food packs nga naglakip sa tag 5 kilos nga bugas, mga canned goods, kape ug uban pa alang sa tanang mga pamilya sa naasoy nga lungsod.
Dason pa ni Oliva nga gipahimangnoan daan ang mga kapitan sa barangay ug mangandam ug mga chain saw nga magamit sa clearing operations.
Matud ni Oliva nga paspas ra kaayo ang mga clearing operations diin ang matag barangay naningkamot nga mahinloan dayon aron mahatud ang mga hinabang sa mga nagkinahanglan human naigo ang maong lungsod sa bagyo.
