Sinulat sa PRIMER
Nagpabilin ang Bohol sa top 20 Most Competitive Provinces sa tibuok nasud samtang dako ang pag-os-os sa ilang ranking ubang lalawigan sa Central Visayas.
Ang Bohol ubos ni Gob. Arthur Yap ug Bise Gob. Rene Relampagos nagpabilin usab nga numero unong competitive province sa Central Visayas.
Kini gipahibawo sa Department of Trade and Industry pinasikad sa 2021 Cities and Municipalities Competitiveness Index (CMCI).
Sumbanan sa paggrado o pagpontos sa mga syudad ug lungsod ang upat ka mga convergent pillars nga mao ang government efficiency, economic dynamism, infrastructure ug resiliency.
Ang 2021 CMCI gipresentar atol sa tinuig nga Regional Competitive Summit nga gi-livestream sa DTI niadtong Dis. 14, 2022.
Namintinar sa Bohol ang ika-20 nga ranggo sukad sa 2020 apan nahagbong ang Siquijor gikan sa ika-24 ngadto sa ika-27; Cebu, gikan sa 26 ngadto sa ika-50; ug Negros Oriental, gikan sa ranggo nga 43 ngadto sa sa ika-70.
Ang tinuig usab nga CMCI gimugna sa National Competitiveness Council pinaagi sa mga Regional Competitiveness Committees ug inabagan sa Unites States Agency for International Development.
Sa niaging semana, nakuha sa kagamhanang probinsiyal sa Bohol ang Seal of Good Financial Housekeeping gikan sa Department of Interior and Local Government.
Kini laing pagmatuod sa katakus, accountability ug kasihag sa pagdumala sa lalawigan ubos sa Yap-Relampagos tandem.
