Sinulat ni Elvira Bongosia
Giklaro sa Department of Health (DOH) ang mga nikatap nga taho nga dili na mahimong mo-donate ug dugo ang mga bakunadong indibidwal.
Sa gipagawas nga public advisory sa DOH, giingong ang bisan kinsang nabakunahan na batok Coronavirus disease (Covid) mahimong mo-donate ug dugo bisan unsang orasa kun asymptomatic kini ug 14 ka adlaw human ang pagkaayo o recovery gikan sa maong sakit.
Isip dugang niini, ang standard criteria alang sa pag-donate ug dugo naglakip sa mga nag-edad ug 16 hangtod 45 anyos nga adunay timbang nga dili moubos sa 50 kilogram.
Kinahanglan usab nga wala niagi ug minor/major surgery, bag-ong tattoo, body piercings, ug anti-rabies/anti-tetanus vaccine sa milabay nga tuig.
Gawas niini, angay usab nga wala nalambigit sa high risk behaviors sama sa casual sex, male-male sex, ug multiple sexual partners.
Kun adunay diabetes ug hypertension, angay nga kontrolado kini.
Ug kun adunay uban pang mga sakit ang indibidwal, kinahanglang masusi una kini.
Pahinumdom pa sa DOH sa publiko, mag-amping sa mga impormasyong atong ipakatap tungod kay ang sayop nga impormasyong ipakatap, mahimong magpasabot ug kinabuhi o kamatayon.
Matud pa sa DOH nga ang sakto ug tukma sa panahon nga impormasyon makaluwas ug mga kinabuhi.
