Sinulat ni Elvira Bongosia
Gipahinumdoman sa Department of Labor and Employment (DOLE) ang mga employers nga ihatag ang ‘premier pay’ sa ilang mga empleyado nga magtrabaho sa special non-working holidays karong buwan sa Pebrero ning tuig.
Matud pa sa gipagawas nga Labor Advisory No. 3, Series of 2022 sa DOLE, ang mga empleyado nga nitrabaho niadtong sa Peb. 1, 2022 o sa Chinese New Year ug karong Peb. 25, 2022 o sa EDSA People Power Revolution Anniversary angay mahatagan ug dugang 30 porsyento sa ilang basic wage.
Ang mga empleyado usab nga mag-overtime sa maong nahisgotang holidays angay mahatagan ug dugang 30 porsyento sa ilang hourly rate.
Samtang ang mga motrabaho sa maong mga holidays nga natunong sa ilang adlaw nga tigpahulay o rest day angay mahatagan ug dugang 50 porsyento sa unang walo ka oras sa ilang pagtrabaho.
Ug alang sa mga mag-overtime sa ilang day-off, angay usab mahatagan ug dugang 30 porsyento sa ilang hourly rate.
Sa mga dili nitrabaho niadtong Peb.1, 2022 ug dili motrabaho karong Peb. 25, 2022 ipatuman ang ‘no work, no pay’ nga polisiya gawas lamang kun adunay paborableng polisiya nga nasabotan o collective bargaining agreement nga maghatag ug suholan sa maong mga espesyal nga adlaw.
Una nang gi-anunsyo sa Malakanyang nga special non-working days ang Peb.1 ug Peb. 25, 2022 pinasikad sa deklarasyon nga gilagdaan ni Presidente Rodrigo Duterte niadtong Okt. 29, 2021.
