Sinulat ni Dave Albarado
Kanhi Bohol Board Member Niño Rey Boniel mi-plead guilty o niangkon sa pagpatay sa iyang asawa nga si kanhi Bien Unido mayor Gisela Boniel.
“Justice has been served”, mao kini ang pamahayag ni Atty. Amando Virgil Ligutan, ang private prosecutor sa kaso sa pagpatay sa kanhi Mayor sa Bien Unido, Bohol nga si Gisela Bendong Boniel.
Si kanhi BM Boniel niangkon sa iyang salaod atol sa hearing nga gipahigayon niadtong Pebrero 8, 2022 didto sa Branch 70 sa RTC Lapu-Lapu City.
Matod ni Ligutan nga nahinabi sa media, nga sila sa prosecution nasorpresa nga wala pa sila mahuman ug presenta sa ilang ebidensya, niangkon na sa iyang kasal-anan si Boniel.
Si kanhi BM Boniel niangkon sa iyang sala pinaagi sa pagsulod sa plea bargaining agreement kon diin ang mga akusado gisentensyahan ug dili mo menus walo ka tuig ngadto sa 14 ka tuig nga pagkapriso.
Matod ni Ligutan nga hinoon aduna pay laing mga kaso nga giatubang silang Boniel nga serious illegal detention ug kidnapping.
Ang mga kaubang akusado ni Boniel naglakip nila ni Wilfredo Hoylar, Restituto Magoncia, Alan Delos Reyes, ug lain pang usa ka akusado nga pulos miingon nga guilty sila sa maong kaso.
Si Gisela matod pa , gipusil kini sa ulo patay ug ang iyang lawas giputos ug pukot ug gilabay sa kadagatan sa Caubian Island ug Olango Island sa Lapu-Lapu City niadtong Hunyo 2017.
