Sinulat ni Rey Anthony Chiu
Gitaho sa National Grid Corporation of the Philippines (NGCP) nga nahuman na ang pagtukod sa mga temporaryong tore diin muagi ang mga linya nga mudala sa gahum dagitab gikan sa Leyte ngadto sa Bohol.
Nagsugod nga mudaloy ang kuryente gikan sa Leyte ngadto sa Bohol nga 4:03 sa hapon niadtong Peb. 9, 2021, sumala sa taho gikan sa NGCP.
Kahinumduman nga napawong ang suga nga dagitab sa Bohol niadtonghapon sa Dis.16, 2021, sa dihang misugod ang kuso-kuso sa hangin nga dala ni bagyong Odette. Ang hangin nga dala sa bagyo maoy nakaingon sa pagkapalong sa gahum dagitab kay ang mga linya sa NGCP nag trip.
Tungod sa kakusog sa hangin, ang mga special towers, nga giingon nga labing taas nga tore sa NGCP sa tibuok nasud, nahagsa. Ang mga special towers maoy gitungtungan sa mga linya sa kuryente nga gikan sa Leyte paingon sa Bohol. Anaa nahimutang ang usa ka special tower sa lungsod sa Carlos P. Garcia ug ang usa ka special tower anaa gibutang sa lungsod sa Ubay.
Ang natumba nga mgabspecial tower, gihimo didto sa nasud sa Germany ug giingon nga mulahutay bisan 100 kilometros kada oras ang gikusgon sa hangin.
Ang maong special tower adunay gitas-on nga 200 metros. Kinahanglan ang maong gitas-on aron makaagi ang mga sakyanan sama sa barko kay nahimutang ang maong mga tore duol sa Basiao Channel.
Kon paabuton pa ang bag-ong mga special tower, madugay usab ang pagbalik sa daloy sa gahum dagitab gikan sa Leyte ngadto sa Bohol.
Mao nakahukom ang NGCP, nga magbutang ug temporaryo nga mga tore aron adunay kalatayan ang mga linya sa kuryente nga gikan sa Leyte.
Ang mga temporaryong tore pinaagi sa Emergency Restoration System (ERS) maoy modawat sa daloy nga korente gikan sa Leyte.
Gibana-bana nga sa Peb. 15, 2022 pa mahuman sa NGCP ang ERS, apan nahuman ang pagtukod sa temporaryo nga tore unom ka adlaw sa dili pa ang gi-ingon nga deadline.
Karon ang kuryenta sa Leyte makatabok na sa Basiao Channel ug madawat na sa substation sa NGCP sa Ubay ug ang maong kuryente mahimo nga ipang pod-apod sa mga distribution utilities sama sa Bohol Electric Cooperative – and 2 (BOHECO 1, BOHECO 2) ug Bohol Light Company Inc.
Mukabat sa 60% sa kuryente sa Bohol nagagikan sa Visayas Grid nga naglangkob sa mga tinubdan sa gahum dagitab sama sa geothermal, coal ug solar power.
Gilauman ang mga special tower mahuman ang pagtukod niini karong Abril 2022.
