Sinulat ni Elvira Bongosia
Target sa nasudnong kagamhanan nga ipahigayon ang binuwan nga “Bayanihan, Bakunahan” vaccination drive sa pipila ka gitumbok nga lugar aron mapasaka pa ang porsyento sa mga nahatagan ug Coronavirus disease (Covid) vaccine., matud pa sa National Vaccination Operations Center (NVOC).
Sa Laging Handa Public Briefing, miingon si Department of Health (DOH) Undersecretary Myrna Cabotaje nga plano usab nilang mahatagan ug espesyal nga pagtagad ang mga senior citizen nga sa pagkakaron, naa sa 2.5 milyon ang dili pa bakunado.
Nalakip sa gi-planong binuwan nga nasudnong pagbakuna, gibutyag ni Cabotaje nga gikonsidera usab nilang magpahigayon ug usa ka eksklusibong adlaw sa pagbakuna alang sa mga senior citizen.
Kalabot niini, nihisgot si Cabotaje nga gawas sa ginahimong pagbisita sa mga kabalayan sa mga senior, gitun-an usab nila ang uban pang pamaagi aron dili maglisod ug mas mapadali ang sistema sa pagbakuna sa mga tigulang.
Base sa datos gikan sa National COVID-19 vaccination dashboard, nigawas nga naa sa 5 milyong senior citizens ang nakadawat sa unang dose samtang 6.2 milyon ang fully vaccinated na batok sa maong respiratory disease.
Samtang kapin sa 1.5 milyong indibidwal usab ang nabakunahan sa gipahigayong ikatulong hugna sa “Bayanihan, Bakunahan” program.
