Makita sa hulagway nga nagdala ug mga mobile filtration machines ang Office of Civil Defense Region 9 nga gitunol ngadto sa mga tinugyanan sa local government unit of Calape. Nahitabo ang maong turnover niadtong Feb. 13, 2022. Contributed photo
Sinulat ni Dave Albarado
Gipaubos na ang Bohol ug ubang mga lugar ug lalawigan sa rehiyon 7 sa mas luag nga Alert Level 2 (AL 2) sugod niadtong Pebrero 16 ug hangtod kini sa Pebrero 28, 2022, matud pa sa mga taho.
Mao kini ang gipadayag ni Acting Presidential Spokesperson ug Cabinet Secretary Karlo Nograles niadtong Pebrero 14, 2022.
Migawas ang maong classification human padayon nga nagkaubos ang mga kaso sa Coronavirus disease 2019 (Covid-19) sa nahisgutang mga dapit nga nakasinati kaniadto ug pagsaka sugod niadtong Enero 2022 dala sa Omicron variant.
Ang mga highly urbanized cities (HUC) nga naglangkob sa Cebu City, Lapu-Lapu City, Mandaue City ug probinsya sa Sugbo ubos sa AL 2 nagsugod niadtong Miyerkules, Peb. 16, 2022, kauban ang mga lalawigan sa Bohol, Negros Oriental ug Siquijor.
Ang pagbutang sa mga nagkalain-lain dapit sa Central Visayas ubos sa AL2, gihatagan ug pagdason ni Dr. Mary Jean Loreche, tigpamaba sa Department of Health sa Region 7.