Sinulat ni Elvira Bongosia
Gi-awhag karon ni Department of the Interior and Local Government (DILG) Kalihim Eduardo Año ang mga local government units (LGUs) sa paghimo ug mga ordinansang magdili sa pagbaligya ug mga tambal sa mga sari-sari store sa tibuok nasud.
Nipagawas ug kamanduan si Año human sa mga taho sa pagkatap sa mga gibaligyang pekeng tambal sa mga gagmay mga retail store.
Dungan niini, gimanduan usab sa kalihim ang Philippine National Police (PNP) nga arestuhon ang mga molapas sa pagbaligya niini ilabi na ang mga pekeng tambal.
Ubos sa Section 30 sa Republic Act No. 10918 o mas giila isip Philippine Pharmacy Act, ang mga tindahan o pharmacy nga may lisensya lamang gikan sa Food and Drug Administration (FDA) ang gitugotang magbaligya ug mga tambal alang sa public consumption.
Samtang nanawagan usab si DILG Undersecretary ug Spokesperson Jonathan Malaya sa publiko nga mopalit lamang ug mga tambal sa mga drug store ug botika nga awtorisadong magbaligya niini.
Kahinumdoman nga sa Talk to the People ni Presidente Rodrigo Roa Duterte ning bag-o lang, gituki ni FDA officer-in-charge director general Oscar Gutierrez Jr. ang kakuyaw sa wala nabantayang pagbaligya ug tambal sa mga gagmay nga tindahan nga mahimong masagolan ug mga peke.
Nitubag usab niini si DILG Kalihim Año nga niingon nga mag-isyu sila ug ‘memorandum circular’ sa mga LGUs aron mahunong ang pagbaligya ug mga pekeng tambal sa mga tindahan.
Gibutyag ni Gutierrez nga gikan Enero 13, 2022 hangtod Peb. 11, 2022 ning tuig, naa sa 185 ka sari-sari store ang nasakpang nagbaligya ug binuok nga tambal, apil ang mga tambal sa Coronavirus disease (Covid).
