Sinulat ni Elvira Bongosia
Gidili sa mga opisyal sa barangay nga mag-endorso ug mga kandidato sa nagsingabot nga eleksyon.
Sa usa ka pahayag, miingon si Department of the Interior and Local Government (DILG) Undersecretary for Barangay Affairs Martin Dino nga ang Pangulo, Ikaduhang Pangulo, mga magbabalaod, mayors ug vice mayors lamang ang mahimong mag-endorso ug mga kandidato.
Gihimo ni Dino ang pahinomdom human makadawat ug mga sumbong ang ilang buhatan nga adunay mga opisyal sa barangay nga dayag ang pag-endorso sa mga kandidato.
Gitumbok niini nga kinahanglang ‘apolitical’ ang mga opisyal sa barangay tungod kay wala sila’y katungod nga mag-endorso ug mga kandidato agi ug pagsunod sa nakalatid sa Omnibus Election Code.
Nahisgotan ni Dino ang usa ka barangay chairman sa syudad sa San Jose del Monte sa Bulacan nga dayag ang pagsuporta sa usa ka presidential aspirant ug usa ka vice presidential aspirant.
