Sinulat ni Elvira Bongosia
Gi-awhag sa Anti-Red Tape Authority (ARTA) ang tanang ahensya sa gobyerno nga ipatuman ang “Zero Backlog Program” agi ug pagsunod sa Republic Act No. 11032 o Ease of Doing Business and Efficient Government Service Delivery Act.
Kini human gipalig-on ug gi-endorso sa Ease of Doing Business and Anti-Red Tape (EODB-ART) Advisory Council ang Memorandum Circular kalabot sa Zero Backlog Report niadtong Peb. 23, 2022.
Sa usa ka pahayag, miingon si ARTA Director General Kalihim Jeremiah Belgica nga tumong niini nga makahatag ug paspas, hapsay, kombenyente ug kasaligang serbisyo sa publiko.
Matud pa nga aron makasunod ang mga ahensya sa gobyerno sa programa, kinahanglan lamang nila nga mag-subscribe sa gitakdang oras sa pagproseso nga nakalatid usab sa balaod.
Ang mga simpleng transaksyon angay nga ma-proseso sulod sa tulo ka adlaw, samtang ang mga complex transactions sa pito ka adlaw ug ang mga highly technical transactions sulod sa 20 ka adlaw. O hinumduman lamang ang 3-7-20.
Gipahayag usab ni Belgica nga may himuong tinuig nga 3-7-20 Day sa Marso 7, alang sa assessment sa mga pending transactions sa mga ahensya ug deadline sa ilang pagsumiter sa Zero Backlog Report o Plan.
