Sinulat ni Elvira Bongosia
Dili pa gihapon angay kompyansahan bisan pa kon nagkaubos na ang kaso sa Coronavirus disease (Covid) dinhi.
Gikan sa 1,125 ka kaso sa kompirmado nga COVID niadtong Enero 31, 2022, nagkabubos na kaayo ang mga kaso karon.
Makita na usab sa talaan ang hinay nga pagkubos sa mga aktibong kaso sama sa 1125 (Enero 31), 917 (Feb 2), 802 (Feb 4), 652 (Feb 7), 625 (Feb 8), 514 (Feb 14), , 334 (Feb 16), 275 (Feb 18) ug 199 (Feb 21).
Apan sa nagkunhod nga aktibong kaso sa Covid, padayon pa gihapon ang hulga niini sa paghunos sa kinabuhi sa mga matakdan niini.
Gani, mas gikahadlokan pa tungod kay sa nagsingabut nga piniliay, gipalubad na sa Commission on Elections (Comelec) ang paglu-ag na sa health protocol ilabi na sa pagpangampanya o in-person campaign.
Kini hinuon nga hunahuna sa Comelec gisupak na ni Health Secretary Francisco Duque.
Pinasikad sa mga taho, gipahinumduman ni Duque ang mga campaign organizers nga did-an ang mga supporters sa mga kandidato sa paghugoyhogoy, kay ania pa ang hulga sa Covid.
Tumanon pa gihapon ang social o physical distancing ug saktong pagsul-ob sa face masks, pahinumdom nila.
Subay sa guidelines sa Comelec, gitugot na ang in-person campaigning apan wala itugot sa mga kandidato nga mosaka sa mga balau, makighagwa ug manggakos sa katawhan samtang gipalikay usab sa paglamano ug pagpahulagway sa selfie nga paagi.
