Sinulat ni Elvira Bongosia
Taliwala sa nagpadayong kampanya sa mga kandidato alang sa piniliay karong buwan sa Mayo, gipahinumdoman sa Department of Education (DepEd) ang mga school-based organization sama sa Parents Teachers Association (PTA) nga dili angay moapil sa mga partisan political activities ilabi na sulod sa school premises.
Sa gipagawas nga pahayag sa DepEd, gitumbok niini nga angay sundon sa mga PTA ang tanang gipatuman niining patakaran ug sumbanan.
Gitumbok niini ang DepEd Order No. 54, series of 2009, diin nakalatid nga gidili ang pag-apil sa partisan political activities sulod sa mga eskwelahan ug angay nga tanang kalihokan sa PTA sa school premises adunay prior consultation ug approval gikan sa school head.
Gipahinumdoman sa DepEd ang mga PTA organization nga angay nga magsilbi sila isip support group ug usa ka mahinungdanong kaabag sa mga tunghaan aron mapalambo ang kaayohan sa mga estudyante.
Una na usab gipahinumdoman sa DepEd ang mga opisyal, mga magtutudlo ug non-teaching personnel niini sa paglikay sa pag-apil sa partisan politics karong nagsingabot nga eleksyon.
