Sinulat ni Elvira Bongosia
Gilagdaan ni Presidente Rodrigo Roa Duterte ang executive order nga nagtinguhang gamiton ang nuclear power isip tinubdan sa kuryente kauban ang uban pang alternatibong tinubdan sa enerhiya.
Sa Executive Order 164, tuyo sa gobyerno nga magbaton ug nasudnong posisyon alang sa Nuclear Energy Program nga mahimong dalan sa paglambo sa nasod ug mahatag sa katawhan ang tinuod nga serbisyo.
Ubos sa maong EO, gimanduan ni Duterte ang Nuclear Energy Program-Inter Agency Committee (NEP-IAC) nga maghimo ug rekomendasyon ug palapdan pa ang pagtuon kun mahimo pang gamiton ang Bataan Nuclear Power Plant (BNPP) ug mahimo kining dalan sa pagtukod ug uban pang pasilidad alang sa paggamit ug nuclear energy.
Gusto ni Presidente Duterte nga mohimo ang Department of Energy (DOE) ug Nuclear Energy Program isip parte sa Philippine Energy Plan sa tabang sa NEP-IAC.
Nakalatid usab sa EO nga ang nuclear power ang posibleng mahimong solusyon sa nagkataas nga panginahanglan sa suplay sa enerhiya diin ikonsiderar ang mga nakat-onan sa milabay nga mga katuigan ug bisan ang mga gisunod nga regulatory frameworks ug best practices sa ubang nasod.
Matud pa sa EO nga seguradohon sa estado ang hilom nga paggamit sa nuclear technology diin ikonsidera ang kaluwasan sa publiko, national security, energy self-sufficiency ug bisan ang pag-amping sa kalikopan.
Gihisgotan usab sa EO nga base sa Public Perception Survey kalabot sa Nuclear Energy niadtong 2019, migawas nga 79% sa mga Filipinos misuporta sa posibleng paggamit ug rehabilitasyon sa kasamtangang nuclear power plant samtang 65% ang misuporta sa pagtukod ug bag-ong power plant ug 78% ang andam nga magbaton ug kahibalo kalabot sa nuclear energy.
Gilagdaan sa Pangulo ang maong EO niadtong Peb. 28, 2022.
