Sinulat ni Elvira Bongosia
Target sa National Economic Development Authority (NEDA) nga sakaan ang pondo alang sa fuel subsidy o ayuda sa mga drayber sa public utility vehicle (PUV).
Sa Talk to the People, gitaho ni Kalihim sa NEDA nga si Karl Chua kang Presidente Rodrigo Roa Duterte nga gi-andam na karon sa Department of Transportation (DOTr) ug Land Transportation Franchising and Regulatory Board (LTFRB) ang pagpanghatag sa subsidiya sa gasolina alang sa mga driver ug operator sa mga pampublikong transportasyon.
Kini isip tabang sa gobyerno sa pagsaka sa presyo sa gasoline tungod sa nagpadayong kagubot tali sa nasod sa Russia ug Ukraine.
Matud pa ni Chua nga naa sa P6,500 ang subsidiya nga ipangapud-apod pinaagi sa Pantawid Pasada Card sa Land Bank of the Philippines (LBP).
Gibutyag sa Kalihim nga gikan sa kasamtangang P2.5 bilyon, isaka sa P5 bilyon ang pondo sa fuel subsidy aron maayudahan ang mga drayber tungod sa padayong pagsaka sa presyo sa mga produktong petrolyo isip epekto sa away sa Russia ug Ukraine.
Matud pa ni Chua,nga target nga ipangapud-apod ang unang parte sa ayuda sa buwan sa Marso ug ang ikaduhang tranche ihatag sa buwan sa Abril ning tuig.
Una niini, gisugyot sa mga economic managers sa Presidente nga ibutang na sa Alert Level 1 ang tibuok nasod tungod kay niubos na ang mga kaso sa Coronavirus disease (COVID-19) ug buksan na ang face-to-face classes.
Gawas niini, giduso usab sa mga economic managers nga dugangan ang fuel vouchers sa mga agricultural producers gikan sa kasamtangang P500 milyong budget ug himuon nang P1.1 bilyon nga ipangapud-apod sa Marso ug Abril.
