Sinulat ni Elvira Bongosia
Gipahinumdoman ug balik sa Bureau of Immigration (BI) ang publiko batok sa mga scammers online nga nangilad sa mga Filipino pinaagi sa ‘love scam.’
Sa usa ka pahayag, subling gibalik ni BI Commissioner Jaime Morente ang iyang unang pahinumdom batok sa sindikato nga nag-abusar sa kahuyang sa mga Filipino nga nangita ug biracial relationships.
“With the re-opening of our borders to foreign tourists comes the return of the love scam,” pahayag pa ni Morente.
Matud pa ni Morente, modus operandi sa sindikato nga makighigala online ug saaran nila ug regalo, byahe ug kasal ang mabiktima nilang Filipino diin mosaad ang pekeng langyaw nga moari sila sa Pilipinas aron pakaslan kini.
Sa pag-abot sa scammer kuno sa Pilipinas, iyang ipahibalo nga gi-hold siya sa mga otoridad sa immigration o ubang ahensya sa gobyerno.
Dinhi iyang haylohon iyang biktima sa pag-deposito ug dakung kantidad bugti sa iyang kagawasan.
Gipagawas na usab kining pasidaan sa BI human sa ilang nadawat nga impormasyon gikan sa usa ka nabiktima diin giingong ang iyang partner gibabagan sa Davao International Airport.
Matud pa nga gipakita sa biktima ang screenshots sa ilang panag-estorya sa tawo nga nagpakaaron-ingnon nga si Morente ug nangayo ug bayad bugti sa pagpagawas sa iyang ‘pseudo-partner’.
Mo ingon ang scammer nga gibabagan siya sa immigration counter tungod sa giingong pagdala ug dakung kantidad sa salapi sa iyang hand carry bag.
“This scammer had the audacity to use my name for his scheme. It is not within our jurisdiction to check bags of arriving passengers. We are concerned with the person and their documents, and not his luggage,” pasabot ni Morente.
Apan sa pagsusi, walay foreign national nga niabot sa Davao mao nga pahinumdom ni Morente sa mga Filipino nga may nakailang langyaw nga mag-amping ug ilhon ug maayo ang pagkatawo niini sa di pa sila makigkita.
