Sinulat ni Elvira Bongosia
Gilagdaan na ni Presidente Rodrigo Roa Duterte ang balaod nga magsiguro sa dekalidad ug barato nga edukasyon ug mga serbisyo alang sa mga estudyante nga adunay kakulian sa panglawas.
Ubos sa Republic Act No. 11650 o “Instituting a Policy of Inclusion and Services for Learners with Disabilities in Support of Inclusive Education Act,” mandato na sa mga pampubliko ug mga pribadong eskwelahan nga seguradohong matag tinun-an nga adunay kakulian sa panglawas magbaton ug igong akses sa dekalidad nga edukasyon.
Nakalatid usab sa maong balaod nga walay estudyante ang hikawan sa higayong makasulod sa usa ka eskwelahan tungod sa iyang kakulian sa panglawas.
Ubos niining bag-ong balaod, mandato sa Department of Education (DepEd) nga magpatukod ug magpadagan ug dili moubos sa usa ka Inclusive Learning Resource Center of Learners with Disabilities (ILRC) sa matag lungsod ug munisipalidad.
Ang maong mga ILRC, nga ipatukod sa tabang sa mga local government units magsilbing one-stop shop alang sa paghatod ug libreng mga serbisyo alang sa mga estudyante nga adunay kakulian sa panglawas.
Ang mga ILRC usab ang magpatuman sa nagkalain-laing mga programa alang sa Inclusive Education.
Matag ILRC magbaton ug mga multidisciplinary teams nga pagalangkoban sa mga eksperto sama sa mga educational psychologists, guidance counselors, developmental pediatricians, physical therapists, speech ug language therapists, special needs teachers ug uban pang allied medical professionals.
Sa pagmugna sa implementing rules and regulations sa balaod, ilatid ang mga minimum services ug conditions nga kinahanglang sundon sa mga sistema sa admission ug polisiya sa mga eskwelahan. Apil na dinhi ang probisyon sa assistive devices, mga pasilidad, ug imprastraktura sa mga admission process, nagkalain-laing porma sa reasonable accommodation, ug uban pa.
