Sinulat ni Elvira Bongosia
Dili kuntento si Presidente Rodrigo Roa Duterte sa P200 nga binuwang ayuda sa mga kabos nga pamilyang Pilipino nga apektado sa pagsaka sa presyo sa produktong petrolyo.
Gimando ni Duterte nga imbes P200, gipadugangan niya kini ug gihimong P500 matag buwan.
Matud pa sa Pangulo nga dili kaigo ang P200 alang sa usa ka pamilya nga adunay tulo hangtod lima ka miyembro.
Si Duterte nagkanayon nga bahala na ang mosunod nga pangulo sa nasud nga mangita ug pondo aron ipang-ayuda.
Nihangyo ang Pangulo sa mga makadawat ug ayuda nga dili unta kini gamiton sa e-sabong.
“So I hope that this would go a long way really to help. Huwag lang sayangin sa e-sabong,” pahayag pa ni Duterte.
Niadtong miaging semana nihatag ug pahayag ang Malakanyang nga target sa gobyerno nga ihatag ang binuwan nga ayuda sa mga benepisaryo sulod ning buwana.
Matud pa ni Acting Presidential Spokesperson Martin Andanar, ang maong cash aid gawas pa sa Pantawid Pamilyang Pilipino Program (4Ps) conditional cash grant nga P3,450 matag buwan.
Ang 4Ps conditional cash grant gilangkoban sa P750 health ug nutrition grant, educational grants alang sa maximum nga tulo ka anak matag usa ka pamilya, (P700 alang sa senior high school, P500 alang sa junior high school, P300 alang sa elementary), ug P600 rice subsidy.
Ang maong kantidad matud pa ni Andanar, ang kantidad nga kayang ihatag sa gobyerno sa pagkakaron.
