Sinulat ni Elvira Bongosia
Gisugdan niadtong Biyernes, Marso 25, 2022 sa Department of Education (DepEd) ang early registration niini alang sa mga pampublikong elementarya ug sekondarya nga mga eskwelahan alang sa sunod nga tuig tingtungha.
Sa gipagawas nga Memorandum No. 17, s. 2022 o ang Conduct of the Early Registration for School Year 2022-2023 sa DepEd nga gilagdaan ni DepEd Kalihim Leonor Briones, ang mga incoming nga Kindergarten, Grade 1, 7, ug 11 kinahanglang magpa pre-register aron mahatagan ug kahigayonan ang ahensya nga makapangandam sa nagkaduol nga pagbalik sa klase.
Samtang dili na kinahanglan magparehistro ang mga Grades 2 hangtod 6, 8 hangtod 10 ug 12 tungod kay gi-konsidera na silang pre-registered.
Matud pa sa buhatan nga tugotan ang in-person registration sa mga ginikanan o guardian sa mga lugar nga gipaubos sa Alert Level 1 ug 2 apan angay pa gihapong mosunod sa minimum health protocol batok Coronavirus disease (Covid).
Alang usab sa mga lugar nga anaa sa Alert Level 3 hangtod 5, mahimong i-rehistro ang mga bata pinaagi sa pagpadala ug text o pinaagi sa social media.
Samtang gi-awhag sa DepEd ang mga pribadong eskwelahan nga dungan nga usab magpahigayon sa ilang kalihokan sa early registration.
Matapos ang kasamtangang school year sa Hunyo 24, 2022 samtang wala pa’y gi-anunsyong petsa ang buhatan kun kanus-a magbukas ang SY 2022-2023.
