Sinulat ni Elvira Bongosia
Namahayag ang Commission on Elections (Comelec) nga magmugna sila ug task force nga mag-imbestiga sa mga nadawat nga taho nga vote buying o pinalitay ug boto.
Si Comelec Commissioner George Garcia namahayag nga kini aron paspas nga maaksyunan ang mga reklamo sa vote buying.
“Magke-create ang commission ng task force para sa lahat ng ganiyang reports, complaints,” matud pa ni Garcia.
Si Garcia nagkanayon nga pagalangkoban ang maong task force sa Comelec, Philippine National Police (PNP) ug Department of Justice (DOJ).
Kahinumdoman nga nag-viral sa social media ang giingong hinatagay ug sobre nga may sulod nga salapi sa mga nitambong sa mga political rally sa pipila ka kandidato sa pagka-pangulo.
Matud pa ni Garcia nga tutokan sa task force ang tanang reklamo sa vote buying.
Apan gitumbok niini nga kinahanglan ang pormal nga pagduso ug reklamo.
Daan nang namahayag si Garcia nga mahimong silotan ang mga mamalit ug boto ug magbaligya sa ilang boto, bisan ang saad o tanyag lang basta igo aron makaimpluwensya ug boto.
Apil sa mga posibleng silot ang pagkabilanggo, disqualification sa pagdagan sa kandidato, ug mawad-an ug katungod sa pagbotar.
