Sinulat ni Elvira Bongosia
Nipasidaan sa publiko ang Professional Regulation Commission (PRC) batok sa mga unofficial Facebook page nga nigamit sa pangalan sa komisyon aron magtanyag ug mga sayop nga serbisyo.
Sa abiso sa PRC, nagtanyag ang maong mga FB pages ug mga tabang sa mga propesyunal sama sa renewal sa ilang Professional Identification Cards (PICs) bugti sa bayad.
Ang PRC nagsunod ug pamaagi ug proseso nga nakalatid sa ilang Citizen’s Charter ug nisalikway sa tanang representasyon nga gikatahong gitanyag sa maong mga Facebook pages.
“The PRC follows procedures and processes as stated in its Citizen’s Charter and disclaims all representations which are reportedly extended by the said Facebook pages,” matud pa sa pahayag sa PRC.
Kalabot niini, gitambagan sa komisyon ang publiko sa pag-adto sa PRC Citizen’s Charter nga nakabutang sa website sa PRC alang sa mga requirement ug timeline sa paggawas sa gikinahanglan nilang dokumento.
