Sinulat ni Elvira Bongosia
Subling nanawagan ang Department of Social Welfare and Development (DSWD) sa publiko sa pag-report sa bisan unsang kaso sa child trafficking.
Apil na niini ang mga nikatap sa social media sites nga “facilitation of illegal adaptation.”
Matud pa sa ahensya, angay ipatuman ang adbokasiya sa katungod ug proteksyon sa mga kabataan sa luwas ug hapsay nga panimalay.
Ang bisan unsang kaso sa child trafficking mahimong isumbong sa Philippine National Police (PNP), National Bureau of Investigation (NBI), Department of Justice (DOJ), DSWD, Commission on Filipino Overseas, ug Bantay Bata.
Giseguro sa DSWD nga padayon silang makig-alayon sa otoridad ug uban pang ahensya sa gobyerno aron masiguro nga mapanalipdan ang kaayohan sa mga kabataan.
Miyembro ang DSWD sa Inter-Agency Council Against Trafficking (IACAT), nga maoy nag-monitor sa pagpatuman sa Republic Act No. 10364 o ang “Expanded Anti-Trafficking in Persons Act of 2012”.
Kahinumdoman nga ning bag-o lang, nataho ang kaso sa 22-anyos nga inahan nga gibaligya ang iyang walo pa ka buwang anak aron mabayran ang utang sa e-sabong.
