Sinulat ni Elvira Bongosia
May katungod nga makadawat ug duha ka higayon sa ilang daily wages o inadlaw nga suholan ang mga trabahante nga mo-trabaho sa gideklarang regular holiday karong buwan sa Abril.
Kini ang gipahinumdom sa Department of Labor and Employment (DOLE) sa mga employer.
Sa usa ka pahayag, si DOLE Kalihim Silvestre Bello III nipahinumdom nga base sa Labor Advisory No.08-22 (Payment of Wages for the Regular Holidays on April 9, 14 & 15, 2022 and Special (Non-working) Day on April 16, 2022), gimanduan ang mga employer sa paghatag ug double pay o dobleng suholan sa ilang mga trabahante nga mo-trabaho sa mga adlaw nga Abril 9, 14 ug 15, 2022 nga mga deklaradong regular holidays.
Kahinumdoman nga ginasaulog matag Abril 9 ang Araw ng Kagitingan samtang Huwebes Santo o Maundy Thursday sa Abril 14, 2022 ug Biyernes Santo o Good Friday usab sa Abril 15, 2022 nga parehong parte sa pagtimaan sa Mahal nga Adlaw o Holy Week.
Samtang deklarado usab nga special non-working holiday ang Sabado Santo o Black Saturday, Abril 16, 2022.
