Sinulat ni Elvira Bongosia
Nagpasidaan ang Commission on Elections (COMELEC), Department of Interior and Local Government (DILG) ug Philippine National Police (PNP) sa mga politiko nga magapil-apil sa pangapud-apod sa fuel subsidy karong panahon sa pagpangampanya.
Gihimo kining pasidaan sa mga nahisgotang ahensya sa gobyerno sa gipahigayong press briefing sa Camp Crame kalabot sa pagpangandam sa seguridad sa umaabot nga eleksyon.
Matud pa sa tigpamaba sa COMELEC nga si Atty. James Jimenez, pasakaan ug kaso ang mga politikong masakpang manghatag ug fuel subsidy.
Gitumbok ni Jimenez nga ang mga otorisadong ahensya sa gobyerno lamang ang mahimong mangapud-apod sa fuel subsidy sa mga tricycle operators ug drivers ug dili bisan kinsang politiko.
Samtang gibutyag ni DILG Kalihim Eduardo Año nga mokabat sa 1.2 milyong tricycle operators ug drivers ang makakuha ug fuel subsidy base na usab sa gipadalang listahan sa mga local government units (LGUs) sa tibuok nasud.
Kalabot niini, giseguro sa PNP nga bantayan nila ang distribusyon sa fuel subsidy aron maseguro nga dili kini magamit sa pangampanya sa mga politiko.
