Sinulat ni Elvira Bongosia
Gibalik na ang mga byahe sa Libreng Sakay nga tanyag sa Land Transportation Franchising and Regulatory Board Region-7 (LTFRB-7) sugod Lunes, Abril 11, 2022 ubos sa General Appropriations Act (GAA) 2022.
Kini human ang malamposon nga pagpatuman sa inisyal nga implementasyon niini nga nakahatag ug libreng pagpasakay sa naa sa 5,941 ka mga pasahero nga kadaghanan mga Authorized Person Outside Residence (APOR) ug mga healthcare workers ilabi na karong pandemya.
Matud pa sa LTFRB-7 nga dili moubos sa 129 ka mga bus gikan sa Vallacar Transit Inc. ug Southern Star Bus Transit Inc. ang gi-deploy na karon sa lalawigan sa Bohol, Cebu ug Negros Oriental.
Ang Libreng Sakay o Service Contracting Program gilauman karon nga makahatag ug dugang serbisyo sa mga manakayay tungod na usab sa mga dugang nga ruta niini.
Ang pagpadayon sa programang Libreng Sakay ubos sa Service Contracting Program Phase 3 agi ug pagsunod sa direktiba ni Department of Transportation (DOTr) Kalihim Arthur Tugade nga hatagan ug transport assistance ang katawhan, ilabi na ang atong mga medical frontliners ug uban pang essential workers.
Sa lalawigan sa Bohol, ang mga ruta mao ang mosunod: Tagbilaran City – San Jose agi sa Tubigon; Tagbilaran City – Talibon agi sa Balilihan-Carmen; Tagbilaran City – Mabini; ug Tagbilaran City – Panglao.
