Sinulat ni Elvira Bongosia
Gi-anunsyo sa Commission on Elections (Comelec) nga pipila ka taas nga opisyal sa gobyerno ang exempted na usab sa gipatuman nga gun ban.
Sa usa ka press briefing, gipahayag ni Comelec chairperson Saidamen Pangarungan nga bisan ang ilang mga security personnel tugotang magdala ug pusil sa panahon sa gun ban nga nagsugod niadtong Enero 9, 2022 ug matapos sa Hunyo 8, 2022.
“We don’t want any senior government official to get injured or lose his life from an armed assailant simply because he cannot defend himself with his own firearm due to the gun ban,” matud pa ni Pangarungan sa press briefing.
Gitumbok niini nga ang maong mga opisyal kinahanglang mahimong luwas sa pagpatuman sa ilang mga katungdanan, gawasnon sa kahadlok ug pagpanghasi gikan sa uban.
Gawas sa President ug Vice President, exempted usab sa gun ban ang Chief Justice, mga miyembro sa Senado ug House of Representatives, ug tanang maghuhukom sa Supreme Court, Court of Appeals, Sandiganbayan, ug Court of Tax Appeals.
Kauban usab sa listahan sa exemption ang tanang mga hukom sa rehiyonal, munisipyo, ug metropolitan nga mga trial court; ang Ombudsman, Deputy Ombudsman, ug mga imbestigador ug piskal sa Opisina sa Ombudsman; ang prosecutor general, chief state prosecutor, state prosecutors, ug prosecutors sa Department of Justice; ug opisyal ug ahente sa National Bureau of Investigation.
Ang mga cabinet secretary, undersecretary, ug assistant Secretaries, tanang opisyal sa eleksyon, provincial election supervisor, ug regional election directors may susama usab nga awtomatikong exemption.
Gipasabot ni Pangarungan nga ang pag-amyenda nagtinguha nga mapadali ug payanohon ang paghatag ug exemptions sa pagbawal sa pagdala, pagtransport sa mga pusil ug uban pang makamatay nga armas sa mga angayan nga aplikante.
