Sinulat ni Elvira Bongosia
Gi-awhag sa Commission on Elections (Comelec) ang mga botante sa pag-adto sa ilang lokal nga buhatan kun mogawas nga deactivated, no record, o under review ang ilang status sa online precinct finder o voter verifier.
Kini human sa pipila ka reklamo nga nadawat sa Comelec gikan sa pipila ka mga botante.
Sa usa ka pahayag, miingon si Comelec Commissioner George Garcia nga kini tungod kay gikan man ang mga datos nga nakuha nila sa mga lokal nga buhatan sa komisyon.
“Ang nagsusumite sa amin ng listahan kung sino ang dapat tanggalin at hindi dapat tanggalin, kung sino dapat i-activate, i-deactivate o i-reactive ay ang local Comelec. Ibig sabihin mo, yun po kasing ebidensya na nagpapatunay kung kayo po ay nakaboto o hindi ay wala po sa position ng main office, ito po ay nasa position ng local Comelec namin,” pasabot ni Garcia.
Gipasabot niini nga sa duha ka nagsunod nga eleksyon niadtong 2018 ug 2019, kun wala nakabotar sa duhang nagsunod nga eleksyon, deactivated na ug wala na’y paagi aron ma-reactivate ang registration sa usa ka botante. Matud pa sa Comelec, angay nga sakto ang mga impormasyong gibutang sa precinct finder apil ang pangalan, middle name, ug apelyido, apil na usab ang probinsiya ug lungsod o munisipalidad diin nagparehistro. Nasod ug embahada o konsulada usab ang alang sa mga overseas voters.
Kun segurado nga nakabotar sa duha ka niaging eleksyon apan deactivated, no record found o under review ang mogawas nga status, moadto lamang sa lokal nga buhatan sa Comelec.
Giingong mahimo usab ma-verify ang status sa gipadalang voters registration sheet. Mao kini kadtong gamay nga papel diin nakabutang kung asa nakarehistro.
