Sinulat ni Elvira Bongosia
Nipasidaan ang Department of the Interior and Local Government (DILG) nga ilegal na ang padayon nga operasyon sa e-sabong ug mahimong arestuhon ug pasakaan ug kaso ang bisan kinsang molapas niini.
“Continuing to operate e-sabong at this time would be illegal. Those who continue to defy the suspension can face arrest and can be charged in court,” pasidaan pa ni DILG Undersecretary ug tigpamaba sa buhatan Jonathan Malaya.
Niadtong Lunes, Mayo 2, 2022, padayon nang gimando ni Presidente Rodrigo Roa Duterte ang pagpahunong sa operasyon sa online sabong agi ug pagsunod sa rekomendasyon ni DILG Kalihim Eduardo Año tungod sa “social cost” niini sa mga Pilipino.
Kini human migawas sa pagtuon sa DILG nga kadaghanan sa mga Pilipino nga ilang gipangutana nga dili uyon sa e-sabong.
Gani, migawas sa maong pagtuon nga 68% ang nag-ingon nga wala nakatabang ang e-sabong sa ilang pinansyal nga panginahanglan.
Samtang naa sa 62% usab ang nag-ingon nga angay suspensohon ang operasyon niini.
Matud pa nga apil usab sa nahimong basehan ni Presidente Duterte nga ihunong ang e-sabong ang moral issue sama sa adiksyon.
Pagsiguro pa sa DILG nga dili na mag-operate ang online sabong hangtod mahuman ang Duterte admistration ug gilauman nga ipadayon usab kini sa mosunod nga administrasyon.
Samtang gibutyag ni Malaya nga gisugdan usab dayon niadtong Martes ang pagpasarado sa tanang e-sabong.
Giingong ang mga magdudula nga apektado sa pagsarado sa operasyon sa e-sabong mahimong mobalik sa tradisyunal nga sabong nga gitugotan na ubos sa Alert level 1 apan kinahanglan ug permit gikan sa local government unit.
Sa pagbanabana sa DILG, adunay 5 milyong e-sabong players sa nasud.
