Sinulat ni Elvira Bongosia
Nagpahinumdom ang Department of Labor and Employment (DOLE) sa mga employer alang sa saktong suholan sa mga empleyado nilang nisulod sa adlaw sa piniliay, nga deklaradong special non-working holiday.
Base sa abiso sa DOLE, ang mga empleyado sa pribadong sektor nga nitrabaho sa adlaw sa eleksyon, Mayo 9, 2022 angay modawat ug dugang 30% sa ilang suholan.
“We highly encourage our workers who are registered voters to exercise their rights to suffrage, and if they will report to work on May 9 after casting their votes, they must receive an additional 30 percent in their daily pay,” matud pa ni DOLE Kalihim Silvestre Bello III.
Ubos sa Labor Code Chapter III sa Artikulo 94, o ang katungod sa holiday pay, ang mga sumbanan sa suholan alang sa Special (Non-Working) Holiday naglatid nga kun ang mga empleyado wala motrabaho, ang “no work, no pay” principle ang angay sundon, gawas lamang kun adunay usa ka patakaran sa kumpanya, kasabotan o collective bargaining agreement (CBA) nga maghatag ug bayad sa usa ka espesyal nga adlaw.
Alang sa nitrabaho sa maong espesyal nga adlaw, bayran sila ug dugang 30 porsyento sa ilang inadlaw nga suholan sa unang walo ka oras nga pagtrabaho [(basic wage x 130%) + COLA].
Alang sa trabahong gihimo sa kapin sa walo ka oras (overtime work), bayran sila ug dugang 30 porsyento sa ilang inoras nga rate sa maong adlaw [hourly rate sa basic wage x 130% x 130% x number of hours worked].
Kong ang mga empleyado nagtrabaho sa usa ka espesyal nga adlaw nga natunong usab sa iyang day off, bayran sila sa dugang 50 porsyento sa ilang inadlaw nga suholan sa unang walo ka oras nga pagtrabaho [(basic wage x 150%) + COLA].
Samtang alang sa overtime nga trabaho sa usa ka espesyal nga adlaw nga natunong usab sa adlaw sa iyang adlaw sa pagpahulay o rest day ,bayran sila ug dugang 30 porsyento sa ilang inoras nga rate sa maong adlaw [Oras nga rate sa inadlaw nga suholan x 150% x 130% x pila ka oras nga pagtrabaho] .
Gitambagan sa DOLE ang mga empleyado nga nag-atubang sa mga isyu sa kakulang sa pagbayad ug wala pagbayad sa saktong suholan nga itawag kini sa DOLE Hotline 1349 o sa pinakaduol nga buhatan sa DOLE sa ilang lokalidad.
