Sinulat ni Elvira Bongosia
Giseguro ni Commission on Elections (Comelec) Commissioner George Erwin Garcia nga wala makaapekto sa kredibilidad sa resulta sa gipahigayong eleksyon ang pipila ka mga problema nga giatubang sa gipahigayong piniliay.
Sa Laging Handa public briefing, miingon si Garcia nga walay epekto ang mga aberya nga nahitabo sa resulta sa piniliay niadtong Lunes, Mayo 9, 2022.
Matud pa ni Garcia nga kaya kining pamatud-an sa mga citizens arm ug mga political parties nga nagbantay sa tibuok proseso sa gihimong piniliay.
Giingong kun may problema mang giatubang sama sa daghang wala dayon nakabotar, nangayo ug pasaylo niini ang komisyon.
Sumala pa nga sa kinatibuk-an, napahigayon ug hapsay ang eleksyon ug naghinaot silang sa mga mosunod nga mga adlaw, maka-proklama na usab sa mga mosunod nga mga lider sa nasod.
Niadtong Lunes sa gabii, gipasabot sa tigpamaba sa Comelec nga si John Rex Laudiangco nga ang mas maayong pasilidad sa poll body ug mas maayong pagbansay sa mga kawani ang nagpadali sa paghatod sa election returns karong tuig kun itandi sa mga niaging piniliay.
Matud pa ni Laudiangco nga kini tungod sa mas maayo nga mga transmission facilities, mas maayo nga programa, mas maayo nga kalidad sa SD card, ug mas maayong pagbansay sa mga kawani ug technician.
