Sinulat ni Elvira Bongosia
Pinaagi sa Executive Order No. 170 nga gipagawas sa Malakanyang, mahimo na usab buhaton ang government disbursement ug collection pinaagi sa digital payment.
Kini human gilagdaan ni Presidente Rodrigo Roa Duterte ang maong kamanduan diin mahimo nang himuon ang pagpagawas ug salapi sa gobyerno nga nakagahin alang sa paghatag ug tabang pinansyal, suholan sa mga kawani, allowance, ug uban pang kompensasyon pinaagi sa digital payment.
Gawas niini, mahimo na usab magbayad ug buhis ug uban pang bayronon ug tolls sa gobyerno pinaagi sa nahisgotan usab nga bag-ong pamaagi.
Taliwala niini, mahimo pa gihapong magbayad ug bisan unsang transaksyon sa gobyerno bisan cash ug uban pang mode of payment.
Samtang gimugna na ang Technical Working Group nga maoy maghimo sa guidelines sa maong balaod nga gilangkoban sa Department of Finance (DOF), Department of Budget and Management (DBM), Bureau of Treasury (BOTr), Bureau of Internal Revenue (BIR), ug Government Procurement Policy Board.
