Sinulat ni Elvira Bongosia
Mahimo nang gamiton alang sa mga batang nag-edad 6 hangtod 11 anyos ang mga bakuna batok sa Coronavirus disease (COVID) sa Moderna nga Spikevax.
Kini human gi-aprobahan sa Food and Drug Administration (FDA) ang amendment sa emergency use authorization sa Moderna.
Base sa clinical data, nigawas nga ang bakuna sa Moderna naghatag ug susamang kaepektibo o efficacy ug safety sa mga kabataan sama sa mga tigulang.
Kahinumdoman nga girebisa sa FDA ang emergency use authorization nga giduso sa Zuellig Pharma Corp., alang sa gi-aprubahang pag-amyenda.
Gipasabot sa ahensiya nga gikonsiderar ang lakang sa National Regulatory Authorities (NRA) sa Canada, European Economic Area, Australia, Peru, Vietnam ug uban pang nasod, aron magamit ang nahisgotang bakuna sa mga bata.
Kini ang ika -unom na nga pag-amyenda sa FDA sa EUA sa Moderna vaccine.
Sa wala pa kini, ang bakuna lamang batok sa COVID sa Pfizer ang gipanghatag sa mga batang nag-edad unom hangtud onse anyos.
