Sinulat ni Elvira Bongosia
Gimanduan sa National Telecommunications Commission (NTC) ang mga telecommunications companies sa pag-isyu ug alerts batok sa spam text messages nga nagtanyag ug trabaho nga may taas nga sweldo.
Sa bag-o lang gipagawas nga abiso sa NTC, gimanduan niini ang mga kumpanya sa telcos nga Globe, Smart ug Dito sa pagpadala o mag-send ug text blasts sa ilang mga subscribers gikan Mayo 28 hangtod Hunyo 4, 2022 nga may mensaheng: “Babala: Huwag pong maniwala sa text na naga-alok ng trabaho na may pangako ng malaking sweldo, ito po ay scam.”
Gimando usab sa NTC sa mga regional directors ug officers-in-charge nga mogawas sa mga lokal nga radio ug television stations aron tambagan ang publiko batok sa fraudulent text scams gikan Mayo 28 hangtod Hunyo 11, 2022. Adunay hangtod Hunyo 15, 2022 sila aron moduso ug compliance report.
Una nang nipasidaan ang mga technology experts batok sa spam messages, ug giingong nagpasa ang mga scammers ug mga ingon niining mensahe aron makakuha ug personal nga detalye sa mga biktima.
Kahinumdoman nga niadtong buwan sa Abril 2022 nga wala gipirmahan ni Presidente Rodrigo Roa Duterte ang balaudnon nga mandatory registration sa tanang SIM cards ug social media accounts, tungod kay giingong kinahanglan pa kini ug mas makuting pagtuon.
