Sinulat ni Elvira Bongosia
Nagpabilin ubos sa Alert Level 2 ang lalawigan sa Bohol hangtod sa Hunyo 30, 2022.
Kini ang gi-anunsyo sa Malakanyang niadtong Miyerkoles, Hunyo 16, 2022.
Si Presidential Communications Operations Office (PCOO) Kalihim ug acting presidential spokesperson Martin Andanar, sa usa ka pahayag, miingon nga ang Inter-Agency Task Force (IATF) mi-aprobar sa rekomendasyon sa Sub-Technical Working Group for Data Analytics.
Samtang 15 ka mga lugar sa lalawigan sa Bohol ang gibutang sa pinakaubos nga alert level 1 status gikan Hunyo 16 hangtod 30, 2022.
Kini mao ang mga lungsod sa Batuan, Calape, Corella, Dimiao, Duero, Garcia Hernandez, Jagna, Lila, Loay, Loboc, San Isidro, San Miguel, Sevilla, Sikatuna, ug syudad sa Tagbilaran.
Kadaghanan sa ubang bahin sa nasod gipaubos sa Alert Level 1 hangtod sa katapusan ning buwan sa Hunyo bisan pa sa natalang gamay nga pagsaka sa mga kaso sa Coronavirus disease (Covid).
