Sinulat ni Elvira Bongosia
Nagpasidaan ang Department of Health (DOH) sa publiko batok sa mga online scammers nga mogamit sa pangalan sa mga opisyal sa DOH aron mangayo ug salapi.
“The department reminds the public that it will not solicit such favors from other DOH units, government agencies nor the public,” matud pa sa gipagawas nga public advisory sa DOH.
Matud pa sa DOH, ang nahisgotang scam kasagarang magsugod sa usa ka random nga numero nga magpakaaron-ingnon isip opisyal sa DOH ug pagkahuman mangayo ug pabor sa pagkuha ug mga gift card.
Tungod niini, gi-awhag sa DOH ang bisan kinsang indibiduwal nga makasugat ug ingon niining modus nga dili ibutyag ang ilang personal information sa mga scammers, e-block kini ug isumbong dayon kini sa mga awtoridad.
Dugang pa sa ahensya nga angay itaho ang mga ingon niining insidente sa NBI-Anti Fraud Division pinaagi sa ilang email afad@nbi.gov.ph o motawag sa Philippine National Police Anti-Cybercrime Group pinaagi sa ilang hotline number (8) 723-0401 local 7491.
