Sinulat ni Rey Anthony Chiu
Adunay duha ka paagi nga makakuha ang usa ka tag-iyahan ug sakyanan sa plaka nga dugay ra niyang gihandum: pinaagi sa online digital verification ug sa walk-in.
Sa mga personal nga mokuha, o walk in, gikinahanglang magdala sa photocopy sa labing bag-o ug dili paso nga rehistro sa sakyanan nga gimatuod sa bag-ong Official Receipt (OR).
Kinahanglan usab nga dalhon ang kopya sa Certificate of Registration, (CR).
Kini ipakita sa empleyado sa LTO alang sa pagproseso sa pagpamatuod niini o pagpa beripika.
Kini nga mga detalye maoy basehan sa empleyado sa LTO sa pagpuno sa mga detalye sa sakyanan diha sa google form.
Dinhi gikinahanglan ang tin-aw ug mabasa nga kopya sa labing bag-o ng dili expired nga Official Receipt (OR) sa rehistro ug ang copya sa Certificate of Registration (CR) sa sakyanan.
Kinahanglan usab ang copya sa Deed of Sale ug photocopy sa usa ka balido nga identification card nga gi-issue sa goberno, kong ikaw ang tag-iya sa sakyanan.
Kong gisugo ka lang, manginahanglan ka ug Special Power of Attorney, government issued identification card sa tag-iya ug imong identification card, aron ma proseso kini.
Gikinahanglan kini nga detalye nga ikaduso ngadto sa database aron masubay ug maberipika.
Didto na makit-an sa empleyado sa LTO sa nasudnong database kong anaa na ba ang nahisgutan nga plaka sa Tagbilaran City.
Kong anaa na ang plaka, pahibaw-on na ang tag-iya nga miproseso sa iyang plaka sa sunod nga schedule sa pagkuha niini.
Matag Sabado ug Domingo lamang ang pagopagawas sa plate numbers kay sa matag Lunes ngadto sa Byernes, pangitaon sa LTO ug mga empleyado sa General Services Office ang plaka sa nagtipun-og nga plaka.
Mahimo usab nga sa online sutaon kong makuha na ba ang plaka.
Una, kinahanglang I scan sa tag-iya ang QR Code sa LTO ug mosulod na dayun sa bit.ly link nga https://bit.ly/38w5EXH
Kompletohon gihapon niya ang mga detalye nga gikinahanglan sa sakyanan diha sa nasampit nga google form, usa ka detalye sa sakyanan ang gikinahanglan aron maduso na ang dokumento.
Kini nga Google form, kinahanglang isubmit usab online aron mapasa ngadto sa nasudnong database ang dokumento ug masubay na ug sugod ang plaka.
Human niini, ang tag-iya, pahibaw-on lang unya pinaagi sa text message kong ang plaka nga iyang gikinahanglan, pwde na nga makuha diha sa scheduled nga pagpang-apod-apod niini sa tagbilaran City Hall Atrium.
Tibuok buwan sa Hunyo, 2022 ang syudad sa Tagbilaran mitugot nga makigtambayayong sa LTO sa pagpang-apod-apod sa mga plaka.
