Sinulat ni Elvira Bongosia
Gibutyag sa usa ka opisyal sa Department of Education (DepEd) nga ang mga tunghaan nga gipaubos sa Coronavirus disease (Covid) Alert Level 1 mahimong lu-agan ang social distancing requirements sa pagsugod sa School Year 2022-2023 taliwala sa pandemya.
Sa Laging Handa public briefing, miingon si DepEd Undersecretary Nepomuceno Malaluan nga pinasikad kini sa pinakabag-ong sumbanan gikan sa Department of Health (DOH).
“Sa Alert Level 1 ay i-relax na din sa darating na pasukan yung physical distancing requirement,” matud pa ni Malaluan.
Apan gidugang ni Malaluan nga limitado pa gihapon ang gidaghanon sa mga estudyante sulod sa mga tunghaan ug ang mga lugar lamang ubos sa Alert Level 1 ug 2 ang mahimong magpahigayon ug face-to-face classes.
Sa pagkakaron, halos 80 porsyento sa mga tunghaan ang andam nang magpahigayon ug in-person classes, matud pa sa DepEd.
Samtang namahayag si Vice President-elect Sara Duterte nga target niya ang “full resumption” sa face-to-face classes paglingkod niya isip bag-ong pangulo sa ahensya.
Kalabot niini, gi-awhag ni Health Undersecretary Maria Rosario Vergeire ang mga ginikanan ug guardians nga pabakunahan ang ilang mga anak sa dili pa magpahigayon sa in-person classes aron maprotektahan sila batok sa Covid.
