Sinulat ni Elvira Bongosia
Gipalawig sa mga awtoridad sa panglawas ang administrasyon sa Coronavirus disease (COVID-19) booster shot alang sa tanang nag-edad 12 hangtod 17 anyos, usa ka semana human ang roll out alang lamang sa mga indibidwal nga adunay health risks, matud pa sa Department of Health (DOH) niadtong Sabado, Hunyo 25, 2022.
“Nagbigay na rin ng ‘oo’ na puwede nang ipatupad rin itong rest of the population ng 12 to 17,” pagbutyag pa ni Health Undersecretary Maria Rosario Vergeire sa Laging Handa public briefing.
Nanghinaot si Vergeire nga sa umaabot nga mga semana, makita ang hinay nga pagsaka sa 12 – 17 booster doses tungod kay kinahanglan man sa kabataan kini nga booster doses.
Ni-arangkada ang pagpamakuna ug booster shot alang sa mga nag-edad 12 hangtod 17-anyos sugod niadtong Lunes, Hunyo 20 apan alang lamang sa mga immunocompromised.
Kahinumdoman nga una nang namahayag si Health Undersecretary Myrna Cabotaje nga ang administrasyon sa booster shots alang sa tanan niining age bracket mahimong sugdan karong semanaha.
Gipagawas sa DOH ang guidelines nga nagtugot sa pagtupok ug Pfizer COVID-19 booster shots alang sa age group human ang 28 ka adlaw nga pagkadawat sa ikaduhang dose.
