Sinulat ni Elvira Bongosia
Ang pagpadayon sa pagparehisto sa mga botante gikan Hulyo 4 hangtod 23, 2022 alang sa Barangay ug Sanguniang Kabataan Elections (BSKE) mag-lakip usab sa uban pang mga transaksyon sama sa reactivation, transfer ug change/silent corrections of entries.
Pinasikad sa Commission on Elections (Comelec) Resolution No. 10798, ang mga transaksyon nga himuon mao ang pag-update sa mga records, pagbalhin, pagbag-o/pagsakto sa mga entry, pagpa-aktibo ug balik ug paghiusa sa mga talaan sa pagparehistro.
Ang mga indibidwal nga adunay kakulian sa panglawas, senior citizens, myembro sa Indigenous Peoples’ o Indigenous Cultural Communities, ug uban pang myembro sa vulnerable sectors angay usab nga ma-accommodate.
Ang mga aplikasyon kinahanglang personal nga iduso sa buhatan sa Election Officer sa lungsod o munisipalidad diin nagpuyo ang aplikante gikan sa alas 8 sa buntag hangtud sa alas 5 sa hapon gikan sa adlaw’ng Lunes hangtod Sabado, kauban ang mga pyesta opisyal.
Ang usa ka botante angay nga dili moubos sa 18 anyos sa dili pa ang adlaw sa piniliay sa barangay sa Disyembre 5, 2022, residente sa Pilipinas nga dili moubos sa usa ka tuig ang iyang pagpuyo sa lugar kun asa siya mobotar o dili moubos sa unom ka buwan sa dili pa ang eleksyon ug wala madiskwalipika sa balaod.
“Any person who has not reached the required voting age or period of residence on the day of registration but will possess such qualifications on or before the December 5, 2022 barangay elections may register as a voter,” matud pa sa nakalatid sa resolusyon nga may petsang Hunyo 22, 2022.
Ang mga botante sa SK kinahanglang dili moubos sa 15 anyos apan dili molapas sa 30 anyos nga nagpuyo sa pagkakaron ug dili moubos sa unom ka buwan o sa dili pa mag-Disyembre 5, 2022 ug wala nadiskwalipika sa balaod.
Ang mga rehistradong botante sugod sa eleksyon niadtong Mayo 9, 2022 angay iapil sa database sa Sangguniang Kabataan System sa kondisyon nga sila dili molapas sa 30 anyos o sa dili pa mag-Disyembre 5, base sa Comelec resolusyon.
Matud pa sa Comelec nga ang mga aplikante angay magdala ug mga dokumento nga pamatuod sa ilang pagkatawo nga adunay hulagway ug pirma, nga mahimong national ID ubos sa Philippine Identification System; ID sa empleyado nga may pirma sa employer o awtorisadong representante; postal ID; Persons with Disability ID; ID sa estudyante o library card nga gilagdaan sa awtoridad sa eskwelahan; ID sa senior citizen; ug driver’s license.
Dawaton usab ang National Bureau of Investigation (NBI) clearance; passport; ID cards nga gi-isyu sa Social Security System (SSS), Government Service Insurance System (GSIS) o Integrated Bar of the Philippines (IBP); Professional Regulatory Commission (PRC) license; Certificate of Confirmation gikan sa National Commission on Indigenous Peoples (NCIP); barangay identification/certification nga adunay hulagway; ug uban pang valid ID cards.
