Sinulat ni Elvira Bongosia
Gipahinumdoman sa Commission on Elections (Comelec) ang mga Pilipino sa pagparehistro alang sa mga mobotar sa Barangay ug Sangguniang Kabataan (SK) election sa Disyembre.
Sa ilang abiso sa ilang Facebook page, gipahibalo sa Comelec nga ang ilang Office of the Election Officer (OEO) sa nagkalain-laing distrito, lungsod ug munisipalidad nidawat na ug aplikasyon alang sa registration sugod niadtong Lunes, Hulyo 4 hangtod Hulyo 23, 2022.
Bukas ang mga buhatan sa Comelec gikan alas 8 sa buntag taman alas 5 sa hapon gikan Lunes hangtod Sabado.
Gipahinumdoman sa komisyon nga ang aplikasyon alang sa pagparehistro isip mga botante kinahanglang personal nga iduso.
Samtang ang mga moduso alang sa pagpa-aktibo ug balik sa ilang talaan sa pagparehistro gitambagan nga ipadala ang ilang mga aplikasyon sa opisyal nga email address sa OEO sa ilang lokalidad.
Modawat usab ang Comelec ug mga aplikasyon alang sa pagbalhin, pagbag-o/ pagsakto sa mga entry sa registration records, pagpaapil sa registration records ug pagbalik sa pangalan sa listahan sa mga botante, ug pagbalhin ug registration records gikan sa langyaw nga post paingon sa lokal.
Kalabot niini, gi-awhag ni Bohol Provincial Election Officer Eliseo Labaria ang publiko sa pagparehistro ug sayo ug dili magpaabot sa katapusang adlaw sa pagparehistro aron malikayan ang panagdasok sa ilang buhatan.
Giklaro usab ni Labaria nga walay lugway sa deadline nga ihatag ang komisyon tungod kay may timeline sila nga gisunod.
“Wala nay extension kay naa tay gisunod na timeline. Mao ra gyud nay bakanti na time,” pasabot pa ni Labaria sa usa ka radio interview.
