Sinulat ni Elvira Bongosia
Giklaro sa Department of Health (DOH) na walay gipakanaog nga direktiba ang gobyerno nga himuong pugos ang pagdawat ug Coronavirus disease (Covid) booster shot.
“Wala pong binigay na statement ang ating gobyerno, ang ating kagawaran na ang ating pagbabakuna ay mandatory. We also did not give any statement that boosters will become mandatory. Wala iyan sa ating direksyon. Wala rin po iyan sa ating pronouncements,” matud ni Health Undersecretary Maria Rosario Vergeire sa press briefing sa buhatan.
Nihatag ug katin-awan ang DOH human unang gikataho nga si Presidente Marcos Jr. miuyon sa sugyot sa departamento sa panglawas nga i-require ang unang booster dose batok sa Covid sa dili pa ang usa ka indibidwal makonsiderar nga hingpit nang nabakunahan batok sa sakit.
Matud pa ni Vergeire nga ang gihisgotan sa ilang pakigpulong sa presidente mao ang teknikal lamang ug walay nahisgotan kun kinsa ang mosunod nga kalihim sa buhatan.
Gidugang usab ni Vergeire nga miingon ang Pangulo nga suportado niini ang DOH ug ang Covid response ug vaccination program.
Giingong kinahanglan lamang mapasaka ang lebel sa pagbakuna, ilabi na ang paghatag ug booster doses sa nasud.
“Dahil nakikita po natin, and even our experts are saying that our immunity for our population is already waning,” pasabot pa ni Vergeire.
Human sa panagpulong kauban si Presidente Marcos Jr., gibutyag ni Vergiere nga magpadayon ang pagtrabaho sa buhatan, kauban ang uban pang mga ahensya sa gobyerno, aron mapakusog ug mapatuman ang mga istratehiya kalabot sa vaccination efforts sa tibuok nasod.
Giseguro usab ni Vergeire nga mohatag sila ug update kun magpatuman ug mga bag-ong polisiya ang administrasyong Marcos alang sa Covid response sa nasod.
